Hugh Grant beðinn að bera vitni í símahleranamáli

Leikarinn Hugh Grant segir að lögreglan hafi beðið sig að bera vitni í rannsókn sem nú stendur yfir á æsifréttablaðinu News of the World, sem sakað er um að hafa hlerað símtöl fólks, meðal annars ungrar stúlku sem var myrt árið 2002.

Frá þessu er greint á vefsíðu the Washington Post í dag en þar kemur fram að leikarinn hafi ítrekað haldið því fram að News of the World hafi brotist inn í símann sinn.

Hugh Grant skrifaði grein um málið á vef pólitíska menningarmiðilsins New Statesman fyrr á árinu. Í greininni birtir hann samtal sitt við fyrrum blaðamann News of the World þar sem sá grunur leikarans að símtöl hans hefðu verið hleruð var staðfestur.

Greinina sem Grant skrifaði má nálgast á vefsíðu New Statesman.