Viktor: Gaman að skora framhjá Ingvari

Hinn 17 ára Viktor Jónsson sýndi góðan leik með Víkingum í kvöld og skoraði seinna mark sinna manna í leiknum og það gegn sínum gamla þjálfara.

„Ég er mjög sáttur með leikinn en hefði auðvitað viljað fá 3 stig eftir að hafa verið svona lengi í forystu. Samt sem áður fannst mér spilamennska hjá okkur öllum mjög góð og við sýndum að við getum þetta alveg.

Ég kunni bara ágætlega við þarna frammi gegn Blikunum og mér fannst ég komast vel frá mínu. Helgi Sig er búinn að vera kenna mér og segja mér til þannig að ég er að skólast hægt og bítandi til í þessari stöðu.

Það er auðvitað alltaf gaman að skora og sem betur fer tókst mér að setja boltann framhjá Ingvari markmanni sem þjálfaði mig nú í yngri flokkunum í gamla daga" sagði Viktor og glotti.