Keflavík getur kvatt fallslaginn með sigri í dag

Einn leikur fer fram í Pepsi-deild karla í kvöld en þá mætast Keflavík og KR í frestuðum leik úr 13. umferð. Mikið er undir í leiknum í kvöld fyrir bæði lið.

KR er á toppi deildarinnar með 40 stig, jafn mörg og ÍBV en með betra markahlutfall. Þessi lið mættust á mánudaginn og skildu þá jöfn, 1-1.

KR-ingar geta því komið sér í mjög þægilega stöðu með sigri í kvöld. Liðið verður þá með þriggja stiga forystu fyrir næstsíðustu umferðina og getur þar með nánast tryggt sér titilinn með sigri á Fylki í síðasta heimaleik sínum á sunnudaginn kemur.

En það er ekki síður mikið í húfi fyrir Keflvíkinga sem eru nú aðeins þremur stigum frá fallsæti. Liðið tapaði á mánudagskvöldið fyrir Fram, 1-0, og fyrir vikið skilja aðeins þrjú stig á milli liðanna í 7.-11. sæti.

Keflavík getur þó kvatt fallslaginn með formlegum hætti ef liðið nær að sigra KR í kvöld þar sem 24 stig duga liðinu til að tryggja sætið sitt í deildinni.

Fram (11. sæti, 18 stig) og Grindavík (10. sæti, 20 stig) eiga vissulega bæði tvo leiki til góða en þar sem þau mætast innbyrðis á sunnudaginn er ljóst að bæði þessi lið komast ekki í 24 stig á tímabilinu.

Leikurinn hefst klukkan 17.00 og verður í beinni lýsingu á Boltavakt Vísis og Fréttablaðsins.