Jón Halldór hættir á toppnum með kvennalið Keflavíkur

Jón Halldór Eðvaldsson, þjálfari kvennaliðs Keflavíkur, stýrði liðinu til Íslandsmeistaratitils í kvöld eftir 61-51 sigur í þriðja leiknum á móti Njarðvík í úrslitaeinvíginu í Iceland Express deild kvenna. Jón Halldór gaf það út eftir leikinn að hann væri hættur með liðið eftir fimm ára starf en liðið varð tvisvar Íslandsmeistari undir hans stjórn.

„Þetta er með því stærsta sem maður hefur afrekað á ferlinum og þetta var ótrúlegt. Það var frábært að ná að klára þetta tímabil svona vel eftir brösugt gengi framan af," sagði Jón Halldór.

„Maður er hálf kjánalegur með þetta og hreinlega orðlaus yfir þessarri frammistöðu. Við missum útlendinginn okkar sem var besti leikmaðurinn á Íslandsmótinu og það var frábært að ná að klára þetta með nýjum útlendingi," sagði Jón Halldór.

„Ég er svo heppinn að vera með frábært lið í höndunum. Ef einhverjar eiga slakan leik þá koma bara aðrar og stíga upp í staðinn. Ég rúllaði á sjö stelpum í úrslitakeppninni og þær áttu allar frábærar innkomur þegar þær fóru inn á völlinn," sagði Jón Halldór en hann var ekki á því að leikurinn í kvöld hafi verið sá léttasti í úrslitaeinvíginu á móti Njarðvík.

„Þetta er erfiðasti leikurinn til þess að undirbúa liðið fyrir hvað varðar andlega þættinn. Að vera tvö-núll yfir á móti liði sem á að vera, innan gæsalappa, slakara en við. Það var frábært að halda haus og klára þetta. Við unnum þetta á vörn í dag," sagði Jón Halldór en hvað tekur við hjá honum.

„Nú er ég hættur og það er bara klárt. Ég er búinn að ræða þetta við formann deildarinnar og við fórum síðast yfir þetta fyrir fjórum dögum síðan. Þetta er orðið ágætt," sagði Jón Halldór.

„Ég er ógeðslega stoltur af þessum tíma sem ég er búinn að vera hérna. Þetta er búinn að vera frábær tími hjá besta klúbb á Íslandi, það er frábært fólk í kringum þetta og nú er bara komið að einhverjum öðrum að taka við," sagði Jón Halldór en það má sjá allt viðtalið með því að smella hér fyrir ofan.