Keane enn sterklega orðaður við landsliðið

Ekkert varð að því að Roy Keane kæmi til Íslands í gær eins og greint var frá snemma dags. Eggert Magnússon, fyrrum formaður KSÍ, kom til landsins ásamt eiginkonu sinni en þau höfðu boðið Keane og eiginkonu hans til Íslands.

Knattspyrnusamband Íslands er nú að leita að nýjum landsliðsþjálfara og sagði Geir Þorsteinsson, formaður sambandsins, um helgina að nokkrir hefðu sýnt starfinu áhuga. Forráðamenn KSÍ vildu ekki staðfesta í gær að Roy Keane væri einn þeirra.

Málið hefur fengið mikil og sterk viðbrögð í Írlandi, heimalandi Keanes, sem og í Bretlandi.

Fréttablaðið setti sig í samband við fréttamann enska dagblaðsins Daily Mail, sem skrifaði um málið í gærmorgun. Heimildir blaðsins herma að Keane hafi átt í viðræðum við Knattspyrnusamband Íslands og að hann verði, þrátt fyrir allt, viðstaddur leik Íslands og Kýpur í dag.

Eggert sagði að ekkert hefði verið rætt við Keane um að taka að sér starfið eins og fullyrt var á vefsíðu Daily Mail í gær. „Ég hef bara rætt við hann af því að hann er gamall vinur minn úr enska boltanum. Hann er mikill fjölskyldumaður og komst ekki frá henni að svo stöddu," sagði Eggert við Fréttablaðið í gær. Aðspurður fullyrti hann að Keane yrði ekki á leiknum í dag.

Keane hefur verið atvinnulaus síðan í janúar síðastliðnum og fullyrða þeir fjölmiðlamenn á Írlandi sem Fréttablaðið ræddi við í gær að Keane komi til greina sem næsti landsliðsþjálfari Írlands, ákveði Giovanni Trapattoni að stíga til hliðar þegar núverandi samningur hans rennur út. Sá gildir fram yfir EM 2012.

Mikil óvissa er um málið eins og er og vildu forráðamenn KSÍ ekkert um það segja hvort þeir hefðu sett sig í samband við Keane eða ekki. Keane er þó enn sterklega orðaður við landsliðið, þó svo að hann hafi ekki komið til landsins í gær.