Þórarinn Ingi: Hann er klókur kallinn

Þórarinn Ingi Valdimarsson var hetja Eyjamanna í 2-1 sigri á Keflavík á Hásteinsvellinum í gær. Þórarinn skoraði sigurmarkið fjórum mínútum fyrir leikslok og Eyjamenn minnkuðu þar með forskot KR á toppnum í eitt stig.

Hinn síungi Tryggvi Guðmundsson átti glæsilega fyrirgjöf á Þórarin í sigurmarkinu og Þórarinn gerði allt rétt þegar hann stangaði boltann í netið. „Það var nú bara þannig að gamli maðurinn setti boltann bara beint á pönnuna á mér og ég þurfti ekki að gera mikið til að skora," sagði Þórarinn, en þetta var aðeins annað markið á ferlinum sem hann skorar með skalla.

Heimir Hallgrímsson, þjálfari ÍBV, var mikið að færa menn til í fyrri hálfleik. Brynjar Gauti Guðjónsson byrjaði í miðverði með Rasmus Christiansen en var svo færður á miðjuna um miðjan fyrri hálfleik. Andri Ólafsson var á sama tíma færður í miðvörðinn úr framherjastöðunni.

„Við byrjuðum í 4–3–3 og ætluðum að setja á þá strax en það var ekki að ganga því við náðum engum tökum á leiknum. Þegar við breyttum í 4–5–1 náðum við spilinu okkar í gang. Hann er klókur kallinn og sá strax að þetta gekk ekki hjá okkur og breytti uppstillingunni," sagði Þórarinn.

Næsti leikur Eyjamanna er á móti KR-ingum og nú munar aðeins einu stigi á liðinum en KR-ingar eiga þó tvo leiki til góða. „Ef menn ætla að vera í þessu langar mann að spila svona leiki. Þetta er algjör lykilleikur á þessu sumri, menn geta ekki verið neitt hræddir og við förum bara í þennann leik til að vinna. Við ætlum að gera allt svo að bikarinn fari ekki í Vesturbæinn, það er alveg á hreinu," sagði Þórarinn Ingi.