Semja tónlist við Djúpið eftir Baltasar

Tónskáldin Ben Frost og Daníel Bjarnason hafa verið ráðin til að semja tónlistina við kvikmynd Baltasars Kormáks, Djúpið. Myndin er innblásin af einstöku afreki Guðlaugs Friðþórssonar sem synti í land eftir að Hellisey VE sökk sex kílómetra undan Vestmannaeyjum árið 1984. Fjórir vinir Guðlaugs fórust í skipsskaðanum en sagan um manninn sem sigraðist á hafinu hefur fylgt þjóðinni síðan. Ólafur Darri Ólafsson mun leika Guðlaug, en myndin verður frumsýnd síðar á þessu ári.

„Ég bjó erlendis þegar þetta gerðist og ætli ég hafi ekki fyrst heyrt söguna af Guðlaugi þegar ég sá einleikinn hans Jóns Atla, hann var mjög áhrifaríkur og magnaður," segir Daníel í samtali við Fréttablaðið, en Jón Atli skrifar einmitt handritið að myndinni. Daníel hefur ekki gert mikið af því að semja tónlist fyrir kvikmyndir en Frost hefur öllu meiri reynslu á því sviðinu, samdi meðal annars tónlistina í kvikmyndinni Rokland. Þá sömdu Frost og Daníel tónverk undir áhrifum frá kvikmynd Andrei Tarkovsky, Solaris, sem var flutt á Listahátíð í Reykjavík fyrr á þessu ári.

„Mér líst vel á þetta verkefni, það er skemmtilegt að fást við kvikmyndatónlist og þá sérstaklega mynd sem er svona sterk og áhrifamikil." Daníel viðurkennir jafnframt að tónlistin verði eðli málsins samkvæmt dramatísk. „Þetta er náttúrlega mögnuð saga sem þarna er verið að segja og merkileg."

Daníel hefur í mörg horn að líta. Hann verður mikið að stjórna á þessu ári og er að semja fyrir tónleika í Los Angeles. Þá var hann að útsetja næstu plötu Sigur Rósar. Tónskáldið vill þó ekki gefa of mikið upp um hvað kom út úr því samstarfi.

„Við höfum þekkst mjög lengi og það var mjög þægilegt að koma inn í þennan hóp. Ég hafði unnið með þeim eitt lag áður, sem var hugsað fyrir bíómynd. Þeir eru alltaf til í allt og reiðubúnir að prófa eitthvað nýtt." Hann staðfestir jafnframt að hljómsveitin sé að leita á ný mið á næstu plötu. „Fólk á alveg eftir að þekkja hljómsveitina en jú, þetta er skref í aðra átt."

freyrgigja@frettabladid.is