Von óskast

Það getur verið auðvelt að fallast hendur í starfi eins og mínu. Þegar tölurnar og staðreyndirnar eru svo yfirgengilegar að engin von virðist til þess að hægt sé að breyta stöðunni, grípa inn í, snúa taflinu við þannig að öll börn njóti mannréttinda í samræmi við Barnasáttmála Sameinuðu þjóðanna sem nær allar þjóðir heims hafa staðfest.



Tölur á borð við þessar eru yfirþyrmandi: Á fjórðu hverju sekúndu deyr lítið barn í heiminum, barn sem við höfum alla burði til að bjarga. Í gagnabanka Interpol er ein milljón mynda af um 20 þúsund börnum sem eru sýnd á kynferðislegan hátt eða beitt kynferðislegu ofbeldi, við vitum aðeins til þess að 800 þeirra hafi fundist og fengið hjálp. Um 69 milljónir barna læra ekki að lesa, skrifa og reikna þó aðeins þyrfti sem nemur eyðslu heimsins í stríðsrekstur í sex daga til að öll þessi börn fengju að njóta réttinda sinna til grunnmenntunar.



Á Íslandi er heimilisofbeldi daglegur kostur a.m.k. 2000 barna og alltof oft gleymist að taka tillit til sjónarmiða þeirra og hagsmuna í þeim erfiðu málum. Samkvæmt nýlegri rannsókn hefur rúmur fjórðungur barna hér á landi orðið fyrir kynferðisofbeldi eða kynferðisáreiti fyrir átján ára aldur. Síðustu tólf mánuði höfum við horft upp á hverjar náttúruhamfarirnar á fætur annarri víða um heim. Börn er gríðarlega berskjölduð í slíkum aðstæðum og þekkt eru dæmi þess að menn nýti sér glundroðann til að misnota börn og selja þau mansali.



En þegar mesta áfallið er yfirstaðið, brettir maður upp ermarnar og hefst handa við að breyta stöðunni, grípa inn í, snúa taflinu við. Því vonina er líka að finna í tölunum. Á þriggja sekúndna fresti bjargar þjálfaður heilbrigðisstarfsmaður barni frá andláti með einföldum, ódýrum aðferðum sem virka. Á síðasta ári bárust ríflega 24 þúsund ábendingar á heimsvísu, um myndir á Netinu þar sem börn eru beitt kynferðislegu ofbeldi, í gegnum ábendingarlínur á borð við þá sem Barnaheill – Save the Children á Íslandi standa að. Á síðustu fjórum árum hefur börnum utan skóla fækkað úr 72 milljónum í 69 milljónir.



Í kjölfar rannsóknar Barnaheilla – Save the Children á Íslandi um félagsleg úrræði sem börnum, sem eru vitni að heimilisofbeldi, stendur til boða, hafa nokkrar stofnanir, sem sinna þeim málaflokki, ákveðið að taka verklag sitt til endurskoðunar. Með því að horfast í augu við þær afleiðingar sem kynferðislegt ofbeldi hefur á barn, getum við veitt öflugri stuðning og hjálp og unnið markvisst gegn slíku ofbeldi. Fumlaus viðbrögð þegar neyðarástand ríkir, þar sem verndun barna er sett í forgang, kemur í veg fyrir að hrikalegt ástand verði enn verra.



Dagur barnsins á Íslandi er næstkomandi sunnudag. Vonin liggur í hverju barni og þar með í okkur öllum. Vertu heillavinur og hjálpaðu Barnaheillum – Save the Children með föstu mánaðarlegu framlagi að breyta stöðunni, grípa inn í, snúa taflinu við.