Fjórar hópuppsagnir í júnímánuði

Alls bárust Vinnumálastofnun fjórar tilkynningar um hópuppsagnir í júnímánuði 2011. Samtals er sagt upp 123 einstaklingum, sem koma til með að missa vinnuna á tímabilinu ágúst 2011 til janúar 2012, eftir lengd uppsagnarfrests.

Fjallað er um málið á vefsíðu Vinnumálastofnunnar. Þar segir að tilkynningarnar séu frá fyrirtækjum í verslun, fiskvinnslu, fræðslustarfsemi og menningar-, íþrótta- og tómstundastarfsemi. Þrjár uppsagnir eru frá fyrirtækjum á höfuðborgarsvæðinu og ná þær til 112 manns og ein frá fyrirtæki á Vestfjörðum þar sem 11 manns var sagt upp.

Aðeins er um að ræða hreinar uppsagnir í einu tilviki, en í tveimur tilvikum er um endurskipulagningu að ræða og líkur á að stór hluti þeirra starfsmanna verði boðin endurráðning, og í einu tilviki er um að ræða sölu fyrirtækis úr þrotabúi og er reiknað með að starfsmenn verði endurráðnir að hluta eða öllu leyti hjá nýjum rekstraraðila.