Birkir Kristinsson: Hjóla í leikina

Birkir Kristinsson markmannsþjálfari Fram og fyrrum landsliðsmarkvörður var að setjast á reiðhjólið eftir sigur Framara í Víkinni í dag. Hann var að vonum ánægður með sigurinn.

„Algjörlega. Það var kominn tími á þetta. Það hlaut að koma að þessu. Við erum búnir að bíða lengi eftir þessu," sagði Birkir.

„Maður hafði það á tilfinningunni að það kæmi í þessum leik. Hlutirnir féllu með okkur. Þeir fengu ágætis færi en Ögmundur var öruggur í markinu og þetta féll okkar megin," sagði Birkir sem man tímana tvenna.

Birkir var að gera sig kláran í að hjóla heim þegar blaðamaður hitti á hann.

„Maður verður að halda sér í æfingu. Hjóla í leikina. Toppformi? Ég væri alveg til í að spila einn leik," sagði Birkir og glotti.