Willum: Sárt að kasta stigum frá sér

Willum Þór Þórsson, þjálfari Keflavíkur, var skiljanlega ósáttur við að lið hans hafi ekki nýtt yfirburði sína í seinni hálfleik gegn Grindavík í kvöld og kastað frá sér í það minnsta jafnteflinu með því að fá á sig mark á lokamínútunum.

„Einbeitingarleysi í lokin. Við pressum ekki nógu vel á manninn sem gefur fyrir og það er maður laus á fjær sem nær að skalla en ég veit ekki hvort hann sé rangstæður, það verða myndavélarnar að sýna. Það er dýrt ef hann er það og markið telur og síðan fáum við ekki víti í lokin sem við eigum að fá. Það er dýrt en við erum að yfirspila þá í seinni hálfleik og skapa fullt af færum. Við getum sjálfum okkur um kennt, að nýta ekki færin og gefa þetta eina færi á okkur í lokin,“ sagði Willum spurður um hvað hafi farið forgörðum hjá hans liðið í kvöld.

„Það var eitt lið á vellinum í seinni hálfleik. Við vorum miklu betri en þeir í seinni hálfleik á öllum stigum fótboltans. Þeir virtust sætta sig við að sækja eitt stig eftir því sem leið á leikinn og við verðum auðvitað líka að vera á vaktinni að gefa ekki frá okkur þetta eina stig eins og við höfum brennt okkur á oft í sumar. Ég virði viljann og metnaðinn til að klára leikinn en leiðtogarnir okkar inni á vellinum verða að taka í taumana og kalla menn til og halda sjó. Við getum ekki gefið stig frá okkur svona endalaust,“ sagði Willum sem vildi ekki lesa mikið í þá stöðu að Grindavík sem er búið að vera í basli í allt sumar sé nú aðeins stigi á eftir Keflavík.

„Það er enginn mælikvarði, við áttum bara klára þennan leik. Ég er ekki í fótbolta og hef aldrei verið í íþróttum með fangið fullt af áhyggjum. Þetta er bara verkefni og ég býð alltaf spenntur eftir næsta leik. Auðvitað er maður mis spenntur og óvissan gerir það auðvitað að verkum að það tekur á taugarnar en ég horfi ekki þannig á hlutina. Við sögðum það þegar í upphafi og erum ennþá á því að við þurfum að slást fyrir hverju stig. Því er mikil ábyrgð á því að kasta frá okkur stigum leik eftir leik. Þetta er sjötti leikurinn í sumar þar sem við gefum frá okkur stig. Ég get talið Þórsleikinn fyrir norðan, þennan leik, Fylkisleikinn í Árbænum og þess vegna Blikaleikinn og KR-leikinn þar sem öll þrjú stigin fuku. Við höfum unnið vel, gert vel og spilað vel og þess vegna er þetta mjög sárt. Þetta er jafn sárt fyrir leikmennina og mig en á meðan við berjumst svona og missum ekki móðinn munum við ná í einhver stig. Það hlýtur öll vinna að skila sér á endanum,“ sagði Willum að lokum.