Enn óvissa með Jósef Kristin - FIFA komið í málið

Lítið gengur í deilum Grindvíkingsins Jósefs Kristins Jósefssonar við búlgarska félagið PSFC Chernomorets Burgas. Jósef, sem æft hefur með Grindvíkingum undanfarnar vikur, hefur enn ekki fengið laun greidd frá félaginu sem ennfremur neitar honum um félagaskipti.

„Honum er eiginlega haldið í gíslingu. Hann er búinn að æfa á fullu (með Grindavík) og kominn í mjög gott stand. Hann iðar í skinninu að fá að spila," sagði Þorsteinn Gunnarsson formaður knattspyrnudeildar Grindavíkur við blaðamann Vísis í dag.

Félagaskiptaglugginn lokar á Íslandi á sunnudaginn og því ákjósanlegt fyrir Jósef Kristinn og Grindavíkur að leysist úr málunum fyrr en síðar.

„Við vonum að Jobba málið leysist en það er erfitt og flókið mál. Það skýrist ekki fyrr en í lok gluggans hvort það detti inn eða ekki. Við höfum ekki útilokað það ennþá en það er það flókið að við erum ekkert sérstaklega bjartsýnir," segir Þorsteinn.

Búlgarska félagið hefur ekki greitt Jósef Kristni laun síðan hann gekk til liðs við félagið sem hann samdi við í febrúar síðastliðnum.

„Góðu fréttirnar eru þær að alþjóða knattspyrnusambandið er komið í málið og er að þjarma að búlgarska liðinu sem hefur ekki staðið við eitt né neitt. Þetta er ekki spurning um hvort heldur hvenær Jobbi kemur til okkar. En ég er voða smeykur um að það náist ekki í þessum glugga, því miður," sagði Þorsteinn.

Búlgarska félagið hefur heldur ekki greitt síðari hlutann af félagaskiptagreiðslunni til Grindvíkinga.