Íslendingar verða að þétta vörnina

„Þetta er ekkert sem kemur á óvart í sjálfu sér. Nú er bara að þétta vörnina," segir Jóhannes Karl Sveinsson hæstaréttarlögmaður sem átti sæti í samninganefnd Íslands vegna Icesave málsins. Hann segir að ákvörðunin sem ESA, Eftirlitsstofnun EFTA, tilkynnti í morgun um að höfða mál gegn Íslandi fyrir EFTA dómstólnum sé endapunktur á málsmeðferð sem sé búin að vera í gangi hjá ESA síðan í maí í fyrra.

„Þessi ákvörðun er í samræmi við það sem er sagt í áminningarbréfinu til íslenskra dómstóla og svo í rökstudda álitinu," segir Jóhannes Karl. Nú sé tekinn við næsti fasi í málinu þar sem EFTA dómstóllinn er beðinn að staðfesta það mat að Íslendingar hafi brotið gegn innistæðutilskipuninni og EES samningum.

Enn er óvíst hvort þess verður krafist að Íslendingar tryggi greiðslur á lágmarkstryggingu sem er um 20 þúsund evrur eða hvort Íslendingum verði gert að greiða alla þá upphæð sem tapaðist af Icesave reikningunum. Aðspurður um þetta segir Jóhannes Karl að ekki sé hægt að sjá á þessu stigi málsins hvernig spurning ESA til EFTA dómstólsins verður en hingað til hafi ESA takmarkað málið við lágmarkstrygginguna.

„Eins og maður les tilkynninguna þá munu þeir eins og áður byggja á annarsvegar að innistæðukerfið á Íslandi hafi klikkað og hins vegar að það hafi orðið mismunun vegna þess að íslenskir innistæðueigendur hafi verið fluttir inn í nýju bankana en ekki þeir erlendu," segir Jóhannes Karl.

Aðspurður vill Jóhannes engu spá um líkur á því að Íslendingar sleppi vel út úr þessu máli. „Ég treysti mér nú ekki til að gefa neinar sérstakar líkur á það. Þetta er bara mál sem er erfitt og getur farið allavega," segir Jóhannes Karl.