Viktor Unnar meiddist á æfingu

Viktor Unnar Illugason var fluttur á sjúkrahús eftir að hafa lent í samstuði á æfingu með Breiðabliki í gær.

Viktor Unnar er ekki eini leikmaðurinn sem þurfti slíka aðhlynningu í gær því Björgólfur Takefusa var einnig fluttur á brott í sjúkrabíl frá æfingasvæði Víkinga eftir að hann meiddist á hné í gær.

Eftir því sem kemur fram á Fótbolta.net var upphaflega óttast að Viktor Unnar hefði viðbeinsbrotnað. Betur fór en á horfðist.

„Ég ætlaði að nýta fríið sem kemur vegna EM til að koma mér í betra form. Þetta er því svekkjandi,“ sagði Viktor Unnar sem verður frá næstu tvær vikurnar.