Björgólfur: Hefur verið hræðilegt tímabil

Björgólfur Takefusa segir ekki vita hversu alvarleg hnémeiðsli sín eru en að það sé góðs viti að krossbönd og önnur liðbönd virðast vera heil.

Björgólfur var fluttur á sjúkrahús eftir að hann meiddist á æfingu með félagi sínu, Víkingi, í gær.

„Þetta gerðist mjög skyndilega," sagði Björgólfur í samtali við Vísi. „Ég var með boltann og stend í hægri löppinna. Þá skyndilega læsist hnéð og ég féll í grasið."

„Ég gat ekki rétt úr hnénu og get það ekki enn. Læknarnir segja að það muni koma með tímanum," bætti hann við.

„Þeir sögðu að mikilvægast fyrir mig væri að komast í segulómskoðun sem fyrst og láta bæklunarlækni og hnésérfræðing líta á hnéð. Vonandi kemst ég í það strax í dag."

Björgólfur ræddi við sjúkraþjálfarann sinn hjá Víkingi í morgun og ræddu þeir um hvenær hann gæti mögulega spilað á ný.

„Ef ég leyfi mér að vera bjartsýnn þá vil ég stefna að því að spila strax eftir fríið í júní. Annars þá í seinni umferð mótsins."

„En það er enn mikil óvissa í kringum þetta og ómögulegt að segja eins og er hvað veruðr. Það jákvæða er að læknarnir gátu ekki betur séð en að liðbönd og krossbönd væru heil og það hlýtur að vera góðs viti."

„En þetta hefur verið hræðilegt tímabil hjá mér þar sem ég hef verið að glíma við endalaus meiðsli."