Umfjöllun: Titilvonir FH lifa góðu lífi

FH vann mikilvægan og nokkuð auðveldan 3-1 sigur á Grindavík í kvöld. FH var 1-0 yfir í hálfleik en kláraði leikinn með tveimur mörkum á fyrstu fimm mínútum seinni hálfleik.

Það var ekki mikið um færi í fyrri hálfleik. Liðin fengu sín hvor tvö færin en FH var mikið meira með boltann og í raun með leikinn í hendi sér þar sem Grindavík náði ekkert að ógna marki FH fyrr en undir lokin og þá úr föstum leikatriðum.

Seinni hálfleikur hófst með látum. FH fékk tvö færi og Grindavík eitt áður en FH skoraði tvö mörk á tveimur mínútum og gerði út um leikinn. Eftir það færðu FH-ingar sig aftar á völlinn og Grindvíkingar fóru að sjá meira af boltanum án þess að skapa sér mikið.

Grindavík náði að minnka muninn þegar fimm mínútur voru eftir af leiknum og fengu tvö færi til viðbótar en það vantaði trúna upp við markið og sigri FH var ekki ógnað.

FH er nú tveimur stigum á eftir ÍBV og KR og heldur enn í vonina um að landa titlinum þó augu þeirra séu fyrst og fremst á að halda Evrópusætinu og þar með Val og Stjörnunni fyrir aftan sig. FH á ÍBV á heimavelli í næstu umferð og gæti því verið komið á toppinn fyrir lokaumferðina falli úrslit úr leikjum KR með þeim.

Grindavík er enn í tíunda sæti og ljóst að liðið leikur algjöran úrslitaleik á heimavelli í næstu umferð gegn Fram. Sigur þar og Grindavík verður í deild þeirra bestu á næsta tímabili.



Grindavík-FH 1-3

0-1 Atli Guðnason (22.)

0-2 Pétur Viðarsson (49.9

0-3 Freyr Bjarnason (50.)

1-3 Magnús Björgvinsson (85.)

Grindavíkurvöllur. Áhorfendur: 603

Dómari: Þóroddur Hjaltalín (6)

Tölfræði:

Skot (á mark): 8-8 (6-5)

Varið: Óskar 2 – Gunnleifur 5

Hornspyrnur: 3-8

Aukaspyrnur fengnar: 9-7

Rangstöður: 3-3