Jóhann: Barcelona-stíllinn hentar okkur ekki

“Þetta var langþráður sigur, svo sannarlega,” sagði Jóhann Helgi Hannesson, Þórsari, eftir sigurinn á Fylki í kvöld. Jóhann barðist einna manna mest og er maður leiksins fyrir vikið.

“Það vantaði ekkert upp á baráttuna í dag. Við höfum ekki verið að spila nógu vel undanfarið en þetta var gríðarlega mikilvægur leikur fyrir okkur. Þegar allir leggjast á eitt þá kemur þetta,” segir Jóhann.

“Við tökum þetta á hörkunni en við erum búnir að vera að spila einhvern Barcelona-bolta sem hentar okkur ekkert. Ég segi ekki að þetta sé eins og Stoke en við erum að reyna að herma aðeins eftir Vinnie Jones og félögum,” sagði Jóhann og hló við.

“En sumarið er ekki búið, núna er lítið fjögurra leikja mót í gangi og það byrjaði vel hjá okkur. Við viljum sýna að við getum spilað góðan og árangursríkan bolta,” sagði Jóhann.