Bjarni: Hissa að sjá Tryggva og Finn á bekknum

Bjarni Jóhannsson, þjálfari Stjörnunnar, var að  vonum ánægður með strákana sína sem eru ólseigir á heimavelli sínum og virðist oft ganga betur gegn sterkari liðunum. Stjarnan vann flottan 3-2 sigur á ÍBV í kvöld.

„Þetta var frábær sigur. Við vorum klárir í slaginn í kvöld. Þetta gekk vel í kvöld þó svo leikurinn hafi verið kaflaskiptur og ekki áferðafallegur á köflum," sagði Bjarni sem er ekki með neitt samviskubit yfir því að hafa skemmt eitthvað fyrir ÍBV.

"Við verðum bara að hugsa um okkur og okkar markmið. Það var ekkert hjá ÍBV sem kom á óvart en ég var hissa að Tryggvi og Finnur skildu ekki byrja hjá ÍBV."