Ásgeir Börkur: Yfirspiluðum þá á löngum köflum

Ásgeir Börkur Ásgeirsson segir að Fylkir hefði hæglega getað fengið eitthvað út úr leiknum gegn Þór á Akureyri í kvöld. 2-0 tap var þó niðurstaðan.

“Mér fannst við yfirspila þá á löngum köflum, sérstaklega í seinni hálfleik og undir lokin á þeim fyrri. Við byrjuðum reyndar alltof langt til baka en þegar við fórum framar á völlinn gekk þetta betur hjá okkur.”

“Við sköpuðum okkur ekki mörg færi en gátum samt skorað. Svona er þetta stundum, boltinn vill ekki inn,” sagði Ásgeir.

Fylkir hefur að litlu að keppa um miðja deild. “Það er kannski rétt en það er samt stutt í toppinn og maður vill alltaf vinna, það er engin spurning. En þetta bara gekk ekki í dag,” sagði Ásgeir.