Þorvaldur Örlygsson: Spilamennska liðsins var virkilega góð

Þorvaldur Örlygsson þjálfari Framara var nokkuð sáttur með spilamennsku síns liðs en að sama skapi svekktur með að halda ekki forystunni til lokaflauts.

„Þetta var góður leikur hjá okkur og gott stig á erfiðum útivelli. Spilamennska liðisins var virkilega góð. Leikmenn lögðu sig alla fram. Samt sem áður sárt fyrir okkur að halda ekki út eftir að hafa náð forystu þegar lítið var eftir, en svona er þetta við erum vanir mótlæti og það þýðir alls ekkert að gefast upp".

Ásýnd Fram liðsins er töluvert öðruvísi með tilkomu nýrra manna í júlí og hafði Þorvaldur ekkert nema gott um framlag þeirra til liðsins að segja.

„Liðið lítur vel út núna og það er auðvitað alltaf gott að vera vitur eftir á. Við vissum það í vetur að við værum ekki með mjög breiðan hóp. Það er kannski gáfulegt að segja núna að við hefðum átt að vera búnir að styrkja liðið fyrr. Að sama skapi getur það líka oft verið áhætta að taka menn inn á miðju tímabili en þessir drengir sem komu núna í júlí hafa aðlagast vel. Þeir eru góðir drengir og góðir fótboltamenn og hafa hjálpa liðinu".

Aðspurður um áframhaldandi fallbaráttu hafði Þorvaldur þetta að segja

„Það eina sem við hugsum um núna er að gera okkar allra besta í þeim leikjum sem eftir eru og sjá hverju það skilar okkur. Það er það eina sem við getum gert. Úrslit annarra leikja er ekki í okkar höndum".