Haraldur: Gaman að keyra brautina með þrjú stig

„Hann var sætur þessi sigur en erfiður enda ekki mörg lið sem koma hingað og vinna. Það er sterkt að labba héðan burt með þrjú stig. Það er erfitt að spila við Stjörnuna – sérstaklega á þessu teppi,“ sagði Haraldur Freyr Guðmundsson, fyrirliði Keflavíkur, glaður í bragði eftir sigur sinna manna á Stjörnunni 3-2.

Haraldur var eðlilega mjög sáttur og hlakkaði bara til að keyra hina skemmtilegu Reykjanesbraut – sem margir fúlsa við.

„Þetta var baráttusigur hjá okkur og við vorum svolítið særðir eftir leikinn fyrir norðan. En við förum náttúrulega í alla leiki til að vinna þá. Það var enginn undantekning á því í dag. Við vorum að spila við lið sem hefur verið á flottu róli en við enduðum sigurgöngu þeirra og það er alltaf gaman að keyra brautina eftir þrjú stig,“ sagði Haraldur glaður í bragði.