Japanskur bílaframleiðandi í samstarf við meistaralið Red Bull

Japanski bílaframleiðandinn Infinity, sem er í eigu Nissan og Formúlu 1 lið Red Bull hafa gert með sér samstarfssamning og mun Infinity auglýsa á bílum Red Bull á þessu ári og hugmyndin er að aðilarnir tveir muni starfa sama á tæknilega sviðinu í framtíðinni. Vefsíðan autosport.com greinir frá þessu í dag.

Eftir sem áður mun Renault bílaframleiðandinn útvega Red Bull keppnisvélar, en Red Bull varð meistari bílasmiða í fyrra og Sebastian Vettel, ökumaður liðsins meistari ökumanna.

Renault og Nissan eru þegar í samstarfi í bílageiranum og því er ekki um hagsmunaárekstur að ræða, þó Infinity, sem framleiðir lúxusbíla styrki og starfi með Red Bull.

"Eftir því sem liðið hefur þróast, þá er mikilvægara fyrir okkur að horfa til framtíðar. Að gæta þess að við séum að vinna með réttum samstarfsaðilum, hvort sem um ræðir markaðslegu hliðina eða á annars staðar", sagði Christian Horner, yfirmaður Red Bull.

Honer telur tæknilega þekkingu hjá Infinity geti komið Red Bull til góða.

"Sem sjálfstætt keppnislið þá erum við ekki sérfræðingar í rafgeymum eða KERS kerfinu. Við viljum einbeita okkur að því að hanna og framleiða undirvagninn og ef við getum nýtt okkur aðra þekkingu frá Nissan og Infinity, þá er það spennandi fyrir okkur", sagði Horner.

Varaforseti Infinity, Andy Palmer hefur trú á því að fyrirtækið geti hjálpað Red Bull hvað mest varðandi rafgeyma og KERS kerfið, en aðrir þættir séu líka mögulegir hvað tæknilega samvinnu varðar.

"Nissan er augljóslega leiðandi í gerð rafmagnsbíla og eftir því sem hlutir færast í þá áttina, þá eru möguleikar á samvinnu. Við sjáum hvað setur. Við erum hér til að svara fyrirspurnum í byrjun og sjáum hvernig þetta gengur", sagði Palmer.