Willum: Öflugt þetta Keflavíkurhjarta

„Þetta var ofsalegur liðsheildarsigur. Við lögðum þennan leik þannig upp að við værum ekkert að fara galopna okkur. Það hefði verið óðsmannsæði. Við fórum vel yfir leik Stjörnunnar og þeir hafa verið á feiknarflugi og mér fannst okkur takast sem lið að loka vel á þá,“ sagði ánægður og glaður Willum Þór Þórsson, þjálfari Keflavíku,r eftir sigur sinna manna gegn Stjörnunni 3-2 í Pepsi deildinni.

„Stjörnumenn vilja koma framarlega og það eru margir í liðinu að stinga sér og sækja en við vissum á móti að það myndu falla með okkur færi og við nýttum okkur það sem okkur bauðst.“

„Við héldum okkar striki þrátt fyrir að þeir kæmust yfir og það þarf sterka skapgerð í það. Enda er liðsheildin og andinn í Keflavíkurliðinu mjög sterkur. Það er öflugt þetta Keflavíkurhjarta,“ sagði Willum og glotti við tönn.