Árni Hauksson: "Munum ekki kaupa meira“

Beinn eignarhlutur viðskiptafélaganna Árna Haukssonar og Hallbjörns Karlssonar í smásölurisanum Högum er aðeins átta prósent þegar eignarhald á samlagshlutafélaginu Búvöllum hefur verið sundurgreint. Árni segir að þeir hafi engin áform um að auka við hlut sinn.

Fyrr á þessu ári keypti samfélagshlutafélagið Búvellir 34 prósenta hlut í Högum af Arion banka og um daginn nýtti félagið sér kauprétt að öðrum 10 prósentum sem afhent verða síðar í þessum mánuði. Félagið mun því halda utan um 44 prósenta hlut í Högum.

Yfirtökuskylda í skráðum félögum samkvæmt lögum um verðbréfaviðskipti miðast við 33 prósenta hlut. Ekki myndast yfirtökuskylda í Högum þar sem félagið er ekki skráð og slík skylda myndast ekki ef hluturinn ef yfir mörkum við frumskráningu, aðeins ef hluturinn fer yfir mörkin eftir skráningu á markað.

Yfirmaður hjá Barclay's bankanum í hópnum

Búvellir er samlagshlutafélag, sem þýðir að hver og einn hluthafi í Búvöllum heldur á beinum eignarhlut í Högum. Eigendur Búvalla er félagið Hagamelur, sem er í eigu félagsins Vogabakka, sem á 50 prósent, en Vogabakki er í jafnri eigu Árna Haukssonar og Hallbjörns Karlssonar. Aðrir hluthafar í Hagamel eru Tryggingamiðstöðin með fjórðungshlut og Sigurbjörn Þorkelsson, sem einnig er með fjórðungshlut, en hann er yfirmaður hjá Barclay's bankanum í Lundúnum. Sigurbjörn er góður vinur þeirra Hallbjörns og Árna, en allir þrír stunduðu á sama tíma nám í verkfræði og fóru síðan saman í framhaldsnám í Stanford-háskóla í Bandaríkjunum. Sigurbjörn hefur síðastliðin tuttugu ár starfað erlendis í bankaheiminum, lengi í Bandaríkjunum.

Aðrir stórir hluthafar í Búvöllum eru Gildi lífeyrissjóður og tveir sjóðir á vegum sjóðsstýringarfyrirtækisins Stefnis. Auk þess eiga nokkrir minni lífeyrissjóðir og félög smærri hluti.

Samsetning eignarhalds á Búvöllum gerir það að verkum að enginn einn hluthafi fer með stærri hlut en 8,5 prósent og sé eignarhaldið smættað niður, eða sundurgreint, eiga þeir Árni og Hallbjörn aðeins átta prósenta beinan hlut í Högum, þó því sé gjarnan haldið fram í sumum fjölmiðlum að þeir séu stærstu hluthafarnir.

„Æskilegast að eignarhaldið sé sem breiðast"

Arion banki hyggst selja 20-30 prósenta hlut í Högum í gegnum Kauphöllina í desember næstkomandi. Árni Hauksson segir að hann og Hallbjörn ættli sér ekki að auka við hlut sinn. „Við erum sáttir við þann hlut sem við eigum og munum ekki kaupa meira. Við nýttum okkur kauprétt núna en það eru engin áform um að auka við hlutinn. Við viljum fá sem flesta þarna inn með okkur sem hluthafa, enda leggjum við áherslu á breitt eignarhald. Þess vegna sé ég ekki fyrir mér að við förum að kaupa mikið meira. Hagar er það stórt fyrirtæki að það er æskilegast að eignarhaldið sé sem breiðast," segir Árni.

Árni og Hallbjörn seldu flestar eignir sínar á Íslandi árið 2005 þegar þeir seldu Húsasmiðjuna. Þeir omu því vel út úr bankahruninu því þeir áttu engar íslenskar eignir í slensku viðskiptalífi. „Við höfum verið að skoða tækifæri á Íslandi frá þeim tíma og höfum skoðað hundruð ársreikninga," segir Árni. Hann segir að undanförnum hafi þeir félagarnir aðallega ávaxtað sitt með því að fjárfesta í skráðum hlutabréfum erlendis.

Hagar högnuðust um rúmlega milljarð, eða sem nemur um 3 prósent af veltu, frá 1. mars til 31. ágúst á þessu ári. Árni Hauksson segir að stór kostur við fyrirtækið sé öflugur mannauður. „Landsliðið í smásöluverslun er þarna innandyra," segir hann.

Stefnt er að frumskráningu 20-30 prósenta hlutar Arion banka í Högum í desember næstkomandi og býðst almenningi að kaupa hlutabréf í fyrirtækinu í gegnum Kauphöllina að lágmarki fyrir 100 þúsund krónur á markaðsvirði á hvern einstakling, eða 10 þúsund krónur á nafnvirði á genginu 10 á hlut, samkvæmt upplýsingum frá Kauphöllinni. thorbjorn@stod2.is