VR og húsnæðismál

Bjarni Þór Sigurðsson skrifar 29. mars 2011 06:00

Íbúðarhúsnæði er ein af grunnþörfum fólks. Hvar á að búa? Er rétt að kaupa eða leigja húsnæði fyrir fjölskylduna. Hér á landi hafa valskostirnir verið fáir. Til að skapa fjölskyldunni öruggt skjól hefur helsti valkosturinn verið að kaupa íbúð enda húsaleigumarkaðurinn á Íslandi frumstæður ef við berum okkur saman við mörg Evrópulönd eins og Þýskaland, Frakkland og Norðurlöndin.

Nú hillir undir að breyting verði á þessu .VR hefur verið leiðandi stéttarfélag í 120 ár og ég tel að svo eigi að vera áfram. Með hugmyndaauðgi og áræðni þeirra sem veljast í forustusveit VR getum við haldið áfram á þeirri braut. Með sögu félagsins að leiðarljósi lagði ég fram tillögu um stofnun húsnæðisfélags VR á stjórnarfundi í janúar. Tillagan var samþykkt einróma í stjórn VR og þykir það nokkurum tíðindum sæta þar á bæ þessi síðustu misserin.

Markmið húsnæðisfélagsins á að vera að kaupa eða byggja íbúðarhúsnæði til leigu eða með búseturétti fyrir félagsmenn VR án tillits til aldurs eða tekna. Ekki er um félagslegt húsnæði að ræða í hefðbundnum skilningi þess orðs, heldur áhugaverðan kost til hliðar við séreignarkerfið fyrir þá VR-félaga sem ekki geta eða vilja binda fjármagn í eigin húsnæði.

VR á umtalsvert fé í sjóðum sem nú eru ávaxtaðir í verðbréfum ýmiss konar. Er ekki tilvalið að nýta fjármuni VR til jákvæðrar uppbyggingar í félagsstarfinu og til hagsbóta fyrir félagsmenn VR? Í ljósi aðstæðna í þjóðfélaginu og á fasteignamarkaði tel ég að þetta sé einstakt tækifæri fyrir öflugt félag eins og VR. Með fjárfestingu á þessum tímapunkti í fasteignum, sem einnig nýtast félagsmönnum, eru slegnar tvær flugur í einu höggi.

Þetta er eitt það jákvæðasta sem frá VR hefur komið undanfarin misseri. Þakka ber öllum stjórnarmönnum VR sem samþykktu þessa tillögu. Það sýnir að þrátt fyrir þrálátar deilur innan stjórnar geta menn lyft sér yfir ágreining og þras og sameinast um jákvæða stefnu og markmið til framtíðar.

Mikil kjaraskerðing í formi kaupmáttarrýrnunar hefur átt sér stað allt frá hruni bankanna. Það á að vera hlutverk forustu VR að endurheimta þennan kaupmátt með öllum tiltækum ráðum. Það er ljóst að VR félagar leggja mikla áherslu á kaupmáttaraukningu samkvæmt kjaraþingi sem haldið var síðastliðið haust og var fylgt eftir með skoðanakönnun meðal félagsmanna.

Þessa kaupmáttaraukningu þurfum við að sækja í kjarasamningum með réttmætum kröfum á samtök atvinnurekanda. Öll viljum við ná hinum glataða kaupmætti til baka sem allra fyrst en verðum að huga að því að kollvarpa ekki almennum stöðugleika með hættu á auknu atvinnuleysi og verðbólgu. En það þýðir ekki að við eigum að beygja okkur í duftið heldur sækja okkar rétt af festu.

Ég hef setið sem varamaður í stjórn VR frá síðustu kosningum og er formaður þeirrar nefndar sem á að annast undirbúning að stofnun íbúðarhúsnæðisfélags VR. Ég óska eftir stuðningi ykkar til að leiða það verkefni til lykta. Jákvæðar og uppbyggilegar fréttir af VR er það sem við þurfum.