Ólíklegt að Jón Halldór taki við karlaliði Keflavíkur

Körfuknattleiksdeild Keflavíkur leitar nú að nýjum þjálfara til að taka við karlaliði félagsins af Guðjóni Skúlasyni sem hætti með liðið í gær.

Gunnar Jóhannsson, formaður deildarinnar sagðist aðspurður í samtali við íþróttadeild í morgun að Sigurður Ingimundarson kæmi til greina í starfið en stjórnin muni hittast á vikulegum fundi í kvöld og fara yfir stöðuna.

Gunnar sagði ólíklegt að Jón Halldór Eðvaldsson taki við karlaliðinu en hann hætti með kvennalið Keflavíkur um helgina eftir að hafa gert það að Íslandsmeisturum.