Danir stefna ekki á gullið á HM

Ulrik Wilbek þjálfari danska landsliðsins í handknattleik kom Dönum verulega á óvart í gær þegar hann gaf það út að Danir væru ekki með lið sem geti stefnt á það að verða heimsmeistari á HM í Svíþjóð.

Wilbek hefur líkt og margir aðrir þjálfarar gefið það út að markmiðið sé að komast í eitt af sjö efstu sætunum sem gefur tækifæri á umspilsleikjum um laust sæti á Ól árið 2012. Margir danskir handboltasérfræðingar eru ósáttir við orð Wilbek og telja að hann sé of varkár og það sé veikleikamerki að ætla sér ekki að taka gullið á HM.

„Ég vil ekki líta út eins og heimskur Danir sem segir að við ætlum okkur að verða heimsmeistari. Við erum ekki með lið sem getur farið alla leið," segir Wilbek í viðtali við Ekstra Bladet en hann hefur verið þekktur fyrir að setja pressu á leikmenn sína. Fyrir Evrópumeistaramótið í Noregi árið 2008 sagði hann að það væri aðeins eitt markmið fyrir EM, að fara alla leið og vinna. Danir stóðu við það og fögnuðu Evrópumeistaratitlinum. Meiðsli lykilmanna hafa sett strik í reikninginn hjá Dönum og segir Wilbek að hann sé aðeins raunsær. „Við höfum misst fjóra leikmenn vegna meiðsla og ég veit ekki hvar við stöndum þessa stundina. Það eru 10 frábær lið á HM og það þarf allt að ganga upp til þess að ná árangri á því móti.

Anders Dahl-Nielsen sem var á árum áður þjálfari og leikmaður KR hér á landi segir að margt hafi komið á óvart hjá Wilbek að undanförnu. „Ég verð að viðurkenna að Wilbek hefur komið mér á óvart að undanförnu. Hann er ekki líkur sjálfum sér, það sem hann hefur sagt virkar ekki vel á mig og val hans á leikmönnum í landsliðið hefur einnig komið á óvart," segir Dahl-Nielsen.