Haukur Ingi: Hundfúlir að fá ekki þrjú stig

Haukur Ingi Guðnason kom inn á í lið Grindavíkur ekki löngu áður en liðið jafnaði metin og fannst bæði þegar hann var utan vallar sem innan að Grindavík hafði verið sterkari aðilinn í leiknum.

„Mér fannst við vera sterkari aðilinn í fyrri hálfleik og súrt að ná ekki að leiða leikinn í hálfleik en þeir fá víti. Menn vildu meina að þetta væri ódýrt en ég sá það ekki af bekknum. Þeir fá mark og leiða í hálfleik og setjast í seinni hálfleik. Þeir ætluðu greinilega að halda fengnum hlut,“ sagði Haukur Ingi eftir leikinn.

„Þeir voru fljótir að detta með alla sína menn aftur fyrir miðju þegar þeir töpuðu boltanum. Það er erfitt að brjóta svoleiðis varnarleik niður en það var frábært að ná marki í lokin. Heilt yfir fannst mér við betri og menn eru hundfúlir inni í klefa með að fá ekki þrjú stig, út frá spilamennskunni.“

Sóknarlega lék Grindavík sinn besta leik í langan tíma og það tók Haukur undir. „Við höfum verið helst til varkárir fram á við og við skoruðum ekki í síðustu tveimur leikjum en við skoruðum tvö mörk og það er hægt að taka það með sér inn í næsta leik sem er hörkuleikur á móti særðum KR-ingum.“

Grindavík hefur leikið sex leiki án taps en fimm þeirra eru jafntefli. „Það er mjög mikilvægt að sanka að sér stigum og þó maður hefði viljað þrjú stig gegn liðunum sem við erum að berjast við á botni deildarinnar eins og Þór og Víkingi þá verður maður líka að hugsa hinum megin frá, á meðan eru þeir ekki að fá þrjú stig. Á meðan við söxum stig af þessum liðum er þetta jákvætt en hins vegar þá vill maður alltaf horfa upp fyrir sig og vill taka aðeins fleiri stig og koma sér aðeins hærra í töflunni. Þetta er týpískt þegar það er ekki langt niður, þá verða menn taugaóstyrkir og það er oft á kostnað sóknarleiksins.“