Umfjöllun: Auðveldur sigur Þórs á Fáskrúðsfirðingum

Þórsarar sigruðu Leikni frá Fáskrúsfirði frekar auðveldlega 5-0 í Boganum á Akureyri í kvöld. Leikurinn var í raun aldrei spennandi, til þess voru yfirburðir Pepsí-deildarliðsins of miklir. Fáskrúðsfirðingar lögðu sig fram til að byrja með í leiknum en eftir því sem á leið gáfu þeir mikið eftir og virtust hvorki hafa trú á verkefninu né hafa gaman af því að spila leikin.

Fyrri hálfleikur var afar rólegur en Þórsarar ógnuðu þó marki gesta sinna nokkuð oft fyrstu mínúturnar og fór þar fremstur í flokki Ottó Hólm Reynisson sem klúðraði tveimur mjög góðum færum á fyrstu 20 mínútum leiksins.

Oft er sagt að allt sé þegar þrennt er og átti það svo sannarlega við hjá Ottó í þetta skiptið því hann braut ísinn fyrir Þórsara á 26. mínútu með góðu skoti utarlega úr vítateig Leiknismanna.

David Disztl bætti svo við öðru marki fyrir Þórsara er hann tók boltann laglega niður í teignum og plantaði honum í markhornið eftir að Gunnar Már Guðmundsson hafði skallað fyrirgjöf Inga Freys Hilmarssonar fyrir fætur hans.

Seinni hálfleikur var mjög svipaður og sá fyrri. Þórsarar sóttu nær stanlaust og hefðu auðveldlega getað bætt við fjölmörgum mörkum. En kæruleysi í bland við klaufaskap varð til þess að þau urðu ekki nema þrjú talsins. Gunnar Már Guðmundsson, David Disztl og Gísli Páll Helgason skoruðu þau. Mark Gísla Páls var sérstaklega glæsilegt, hann smellti boltanum í samskeytin og inn á Leiknismarkinu með föstu snúningsskoti eftir að hafa leikið sjálfur af hægri kantinum inn á teig og látið vaða.

Spurningin er hvort svona leikir eigi ekki frekar heima á heimavöllum smærri liðana þar sem skemmtanagildið er eflaust töluvert meira á þann veginn bæði fyrir leikmenn og áhorfendur. En áhorfendur hafa eflaust sjaldan verið jafn rólegir á Þórsleik eins og í kvöld enda nákvæmlega engin spenna í leiknum.

Þór – Leiknir F. 5-0Skot (á mark): 22 – 3 (13-2)

Varin skot Björn Hákon 2 – Óðinn 7

Hornspyrnur: 10–2

Aukaspyrnur fengnar: 8–5

Rangstöður: 2–0