Keflavík skoraði fimm á Egilsstöðum

Keflvíkingar eru komnir áfram í 16-liða úrslit Valitor-bikarkeppni karla eftir öruggan 5-0 sigur á Hetti á Egilsstöðum.

Heimamenn náðu þó að halda spennu í leiknum vel lengi en Haraldur Freyr Guðmundsson, fyrirliði Keflvíkinga, braut ísinn fyrir sína menn undir lok fyrir hálfleiks.

Friðrik Ingi Þráinsson, leikmaður Hattar, fékk svo að líta rauða spjaldið í upphafi seinni hálfleiks og var eftirleikurinn auðveldur fyrir Keflvíkinga.

Brynjar Örn Guðmundsson, Adam Larsson, Jóhann Birnir Guðmundsson og Magnús Þórir Matthíasson skoruðu mörk Keflavíkur í seinni hálfleik.

Keflavík varð tólfta liðið til að komast áfram í 16-liða úrslitin en 32-liða úrslitunum lýkur í kvöld með fjórum leikjum.

Hægt er að fylgjast með þeim öllum samtímis á Miðstöð Boltavaktarinnar.

Upplýsingar um markaskorara frá Fótbolti.net.