Andri Marteinsson rekinn frá Víkingi

Andri Marteinsson er hættur sem þjálfari Víkinga í Pepsi-deild karla í fótbolta en hann stýrði sínum síðasta leik þegar Víkingar töpuðu 0-1 á móti Fram í gær í sannkölluðum sex stiga leik í botnbaráttu deildarinnar. Andri var rekinn í dag.

Andri tók við Víkingsliðinu á vormánuðum þegar Leifur Garðarsson var rekinn og hafa Víkingar því látið tvo þjálfara taka pokann sinn á innan við hálfu ári.

Víkingar léku ellefu deildarleiki undir stjórn Andra, unnu þann fyrsta en hafa síðan aðeins náð í fjögur stig af 30 mögulegum.



Fréttatilkynning frá Knattspyrnudeild Víkings

Í ljósi árangurs úrvalsdeildarliðs Víkings í undanförnum leikjum hefur stjórn knattspyrnudeildar félagsins farið þess á leit við Andra Marteinsson og Ólaf Ólafsson að þeir láti af störfum sem þjálfarar liðsins. Hafa Andri og Ólafur fallist á þessa beiðni með hagsmuni félagsins að leiðarljósi og úr er samkomulag um að þeir láti af störfum frá og með deginum í dag 19. júlí 2011.

Á þeim fimm mánuðum sem liðnir eru frá því Andri Marteinsson tók við störfum af Leifi Garðarssyni við erfiðar aðstæður hefur honum að mati stjórnar ekki tekist að ná nægilega góðum árangri með liðið. Það er því með trega í hjarta sem sú ákvörðun er í dag tekin að slíta þessu samstarfi.

Knattspyrnudeild Víkings þakkar Andra og Óla fyrir vel unnin störf og óskar þeim alls hins besta í framtíðinni.

Þriðjudagur 19.07.2011

Knattspyrnudeild Víkings