Björn Einarsson: Þetta var mjög erfið ákvörðun

Andri Marteinsson var í kvöld látinn fara sem þjálfari meistaraflokks karla hjá Víkingum og félagið leitar nú að eftirmanni hans. Víkingar vonast til að geta tilkynnt um nýjan þjálfara á morgun sem verður þá þriðji þjálfari liðsins á rúmum fjórum mánuðum.

„Þetta var mjög erfið ákvörðun en stjórnin og Andri sjálfur voru sammála um það að félagið skipti öllu máli. Það er enginn stærri en félagið og þetta er allt gert í fullu samkomulagi eins og kom fram í tilkynningunni frá okkur," sagði Björn Einarsson, formaður Knattspyrnudeildar Víkings.

„Liðið er að spila undir væntingum og árangurinn er undir væntingum. Andri kom inn í mjög erfiðar og krefjandi aðstæður þegar hann tók við af Leifi (Garðarssyni) á sínum tíma," sagði Björn sem ítrekaði hversu feykilega erfið ákvörðun það var að láta Andra fara.

„Nú verður bara unnið hratt því við megum engan tíma missa í að finna næsta þjálfara. Það er sutt í næsta leik," sagði Björn en næsti leikur Víkinga er á móti Þór sem er einn af úrslitaleikjum sumarsins í fallbaráttunni.

„Það er alltaf verið að stilla upp öllum leikjum sem úrslitaleikjum en menn vita nákvæmlega hvað þarf að gera. Næsti leikur er gríðarlega mikilvægur eins og allir þeir ellefu leikir sem eru eftir," sagði Björn sem segist vera í viðræðum við þjálfara en vill ekki gefa upp hverjir koma til greina sem næsti þjálfari liðsins.

„Við erum að sjálfsögðu byrjaðir í viðræðum við þjálfara. Það verður unnið hratt í kvöld og við eigum fastlega von á því að tilkynna um nýjan þjálfara á morgun," sagði Björn.