Rúnar: Frábær sigur í erfiðum leik

Rúnar Kristinsson þjálfari KR-inga var sigurreifur í leikslok og hrósaði lærisveinum sínum fyrir sterkan karakter í baráttusigri gegn Fram.

„Þetta var frábær sigur í erfiðum leik. Mér fannst við eiga skilið að sigra. Þetta tók langan tíma en það var þess virði að bíða eftir markinu. Framarar voru hættulegir en samt fannst mér við ná að stýra leiknum og þá sérstaklega á síðasta hálftímanum. Það var þá sem við náðum að koma inn fyrirgjöfum og skapa okkur fullt af tækifærum. Náum svo loks að klára þetta með föstu leikatriði sem ég er ánægður með," sagði Rúnar.

„Það jákvæða sem hægt er að taka úr þessum leik er sá karakter sem liðið sýndi þrátt fyrir að lenda í ákveðnu mótlæti í fyrri hálfleik. Menn fóru súrir inn í hálfleikinn eftir þennan vítaspyrnudóm en við ákváðum hinsvegar að halda bara okkar striki og spila þann leik sem við kunnum best. Halda boltanum innan liðsins og vanda lokasendinguna þegar kom að því að skapa færi," sagði Rúnar.

„Framarar komu mér ekkert á óvart. Ég vissi að þetta væri gott lið og þeir hafa verið að spila ágætisleiki þrátt fyrir að hafa ekki enn náð að landa sigri í vor. Fram spilar meiri fótbolta en þeir gerðu í hitteðfyrra og eru auðvitað komnir með Arnar Gunnlaugsson sem er frábær leikmaður en því miður fyrir Framara hefur þetta ekki alveg gengið upp hjá þeim hingað til," sagði Rúnar.

„Við eigum FH eftir viku og það er bara erfiður leikur eins og allir leikir í þessari deild og það má auðvitað ekkert slaka á í þeirri baráttu," sagði Rúnar að lokum.