Íslandsbanki áfrýjar í málum stofnfjáreigenda

Íslandsbanki hefur ákveðið að áfrýja til Hæstaréttar dómunum fjórum sem féllu í héraðsdómi á dögunum og vörðuðu skuldamál stofnfjáreigenda í Byr og Sparisjóði Norðurlands sem höfðu fengið lán hjá Glitni til þess að auka við stofnfjáreign sína. Íslandsbanki tapaði þremur málanna og vann eitt, en öllum málunum verður áfrýjað.

Samkvæmt heimildum fréttastofu eru ástæður þess að bankinn hefur ákveðið að áfrýja aðallega þær að um prófmál sé að ræða sem mikilvægt sé að fá endanlega niðurstöðu í. Þá voru dómarnir ekki samhljóða eins og áður sagði og þar að auki gætu dómarnir haft fordæmisgildi fyrir aðra stofnfjáreigendur. Málin fjögur sem héraðsdómur dæmdi í á dögunum voru valin í samráði við lögmenn lögmenn stofnfjáreigenda.

Bankinn telur því mikilvægt að fá niðurstöðu sem fyrst og vonast menn til þess að niðurstaða liggi fyrir í byrjun sumars. Bankinn mun einnig beita sér fyrir því að málið fái skjóta afgreiðslu.

Öllum lántakendum hefur verið boðinn frestur til að greiða skuld sína fram á haust og munu langflestir þeirra hafa þegið þann frest. Uppreiknað virði lánanna sem um ræðir eru tæpir tólf milljarðar og þeir skiptast á ríflega 400 einstaklinga og um 20 fyrrtæki.