Jón Guðni búinn að semja við lið í Belgíu

Framarar urðu fyrir miklu áfalli í dag þegar lykilmaður liðsins, Jón Guðni Fjóluson, skrifaði undir þriggja ára samning við belgíska félagið Germinal Beerschot. Samningurinn gildir frá og með 1. júlí næstkomandi. Jón Guðni mun væntanlega spila með Fram þar til hann fer út.

Þorvaldur Örlygsson, þjálfari Fram, vildi ekki staðfesta við Vísi að kaupin væru gengin í gegn en sagði að þau væru á lokasprettinum.

Samkvæmt heimildum Vísis getur ekkert komið í veg fyrir að Jón Guðni gangi í raðir félagsins og er þegar búið að boða til blaðamannafundar ytra vegna kaupa félagsins á leikmanninum. Jón Guðni stóðst læknisskoðun hjá félaginu í morgun.

"Vonandi gengur þetta upp fyrir strákinn. Auðvitað vildum við halda honum en við erum ánægðir fyrir hans hönd ef þetta gengur í gegn," sagði Þorvaldur við Vísi en hann vildi ekkert tala um hversu mikið Fram fengi fyrir Jón Guðna.

Germinal Beerschot varð í tíunda sæti í belgísku úrvalsdeildinni í fyrra og ætlar sér enn stærri hluti á næstu leiktíð.

Það hefur lengi legið í loftinu að Jón Guðni færi í atvinnumennsku og hann hefur meðal annars reynt fyrir sér hjá liðum eins og AEK Aþenu og FC Bayern.