Andri: Mætum af krafti eftir frí

Andri Marteinsson þjálfari Víkings var ekki í neinum vafa um það hver vendipunkturinn í tapinu gegn Fylki í kvöld var. Það var glæsimark Baldurs Bett aðeins mínútu eftir að Víkingar höfðu jafnað metin í upphafi seinni hálfleiks.

„Við vorum lélegir í fyrri hálfleik en náðum okkur á strik í þeim seinni og vorum einbeittir í okkar aðgerðum. Við fáum á okkur þetta mark í fyrri hálfleik sem var verðskuldað en jöfnum svo í seinni og vorum að mínu mati líklegir til afreka en fengum svo á okkur þetta mark sem var algjört kjaftshögg og það hefur mikil áhrif á sjálfstraustið,“ sagði Andri eftir leikinn.

Víkingar eru með sex stig eftir fyrstu sjö umferðirnar og Andri gat ekki neitað því að þeir hefðu viljað safna fleiri stigum fyrir EM U-21 árs landsliða sem nú er hafið hjá liðinu.

„Ég held að það sé alveg ljóst að menn höfðu vonast eftir betri úrslitum og fleiri stigum. Við gerðum þrjú jafntefli, töpuðum þremur og unnum einn, ég hefði viljað hafa unnið að minnsta kosti einum leik meira og þá eitt tap minna. Menn hefðu verið sáttir með níu stig,“ sagði Andri sem hyggst nýta fríið vel.

„Við eigum bikarleik 19. og því er fríið ekki eins mikið og menn ætla en við þurfum aðeins að taka okkur frí frá hverjum öðrum og boltanum til að hlaða rafhlöðurnar en svo mæta menn af krafti og við tökum okkur saman í andlitinu,“ sagði Andri að lokum.