Elvar Már: Skotin voru að detta í dag

"Þetta var bara liðssigur," sagði Elvar Már Friðriksson, 17 ára leikmaður Njarðvíkur, eftir sigur á Haukum, 107 – 91 í Ljónagryfjunni í kvöld.

Elvar Már átti frábæran leik og setti nokkra mikilvæga þrista ofan í sem og að stjórna liði sínu eins og herforingi. Það var ekki að sjá leik hans að hann væri að stíga sín fyrstu skref í deild þeirra bestu. Ásamt honum var annar ungur strákur, Ólafur Helgi Jónsson, sem átti skínandi góðan leik og skoraði 18 stig.

"Þetta er annar leikurinn minn í efstu deild og skotin voru að detta í dag. Þegar þeir fóru í svæði byrjuðum við að negla þessum skotum og þau fóru niður hjá okkur. Það var jafnvægi á þessu – við vorum að skora inn í teig og líka fyrir utan teig," sagði Elvar Már eftir leikinn í kvöld.

En hvernig er að spila í efstu deild eftir að hafa einungis spilað með yngri flokkunum? "Þetta eru mikil viðbrigði en þetta er miklu skemmtilegra. Við ætlum að halda áfram á sigurbraut," sagði hann en Njarðvíkingar eru búnir að vinna fyrstu tvo leikina á þessu tímabili.

Hann segir það ekkert mál að hafa pabba sinn á hliðarlínunni en Friðrik Ragnarsson, þjálfari Njarðvíkur er faðir Elvars. "Það eru kostir og gallar við þetta," sagði hann. "En fleiri kostir samt," sagði þessi ungi efnilegi leikmaður brosandi að lokum.