Ferðamenn aldrei verið fleiri í júnímánuði

Samkvæmt talningum Ferðamálastofu fóru 65.606 erlendir ferðamenn frá landinu um Leifsstöð í júní síðastliðnum eða 11.215 fleiri en í sama mánuði í fyrra. Aukningin nemur 20,6% milli ára og hafa ferðamenn aldrei verið fleiri í júnímánuði.

Í tilkynningu frá Ferðamálastofu segir að ef litið er til einstakra markaðssvæða má sjá 50,4% aukningu frá N-Ameríku, 17% aukningu frá Norðurlöndunum, 15,7% frá Mið- og Suður Evrópu, 7,6% frá Bretlandi og 12% frá löndum innan og utan Evrópu sem eru flokkuð saman undir ,,Annað”.

Af einstaka þjóðernum voru flestir ferðamenn í júní frá Bandaríkjunum (17,7%) og Þýskalandi (14,6%) en þar á eftir fylgdu ferðamenn frá Noregi (8,1%), Danmörku (6,9%), Bretlandi (6,6%), Svíþjóð (6,1%) og Frakklandi (6,0%). Samanlagt voru þessar sjö þjóðir tæplega tveir þriðju ferðamanna í júní.

Alls hafa 206.886 erlendir ferðamenn farið frá landinu það sem af er ári eða 35.636 fleiri en á sama tímabili í fyrra. Aukningin milli ára nemur 20,8%. Aukning hefur verið frá öllum mörkuðum, langmest þó frá N-Ameríku eða 47,8%. Þar næst kemur Mið- og Suður Evrópa með 22,2% aukningu og Norðurlöndin með 20,4% aukningu. Aukningin frá Bretlandi er heldur minni eða tæp 8% og um 11% frá öðrum svæðum.

Brottförum Íslendinga fjölgaði um fimmtung í júní frá því í fyrra, voru 37.438 í ár en 30.736 í fyrra. Brottförum Íslendinga frá áramótum hefur að sama skapi fjölgað um ríflega fimmtung (22,7%) í samanburði við sama tímabil árið 2010.