Fjalar í Fylkismarkið - Bjarni fingurbrotinn

Bjarni Þórður Halldórsson, markvörður Fylkis, er fingurbrotinn og leikur því ekki með liðinu næstu vikurnar. Fjalar Þorgeirsson mun því endurheimta sæti sitt í byrjunarliðinu.

Þetta kom fram á vefsíðunum Fylkismenn.is og Fótbolti.net í kvöld. Bjarni Þórður segir í samtali við síðarnefndu síðuna að hann hafi brotnað í leik Fylkis gegn KR í undanúrslitum Lengjubikarkeppninnar en að hann hafi harkað af sér síðan.

„Ég ætlaði ekkert að láta skoða þetta en konan dró mig í það. Læknirinn segir að ég verði frá í sex vikur, eigum við þá ekki að segja að ég verði frá í fjórar?“

Bjarni Þórður er uppalinn Fylkismaður en hefur leikið með Stjörnunni síðustu ár. Hann sneri aftur til félagsins nú í haust.

Fylkir mætir næst ÍBV í Vestmannaeyjum á laugardaginn en liðið tapaði fyrir Grindavík, 3-2, í fyrstu umferð Pepsi-deildarinnar nú fyrr í vikunni.