Verður að binda endi á óvissuna hjá Löwen

Síðustu þrjú árin hefur danski skartgripasalinn „Kasi-Jesper" Nielsen lagt meira en tíu milljónir evra í þýska handboltafélagið Rhein-Neckar Löwen. Nú virðast tengsl hans við félagið að rofna og var fjallað um fjárhagslega framtíð Löwen í þýska dagblaðinu Mannheimer Morgen í gær.

Nielsen ætlaði að gera Löwen að besta handboltafélagi heims en hefur síðan þá sett meiri púður í heimafélagið sitt, AG Kaupmannahöfn. Eftir situr Löwen sem er enn án titla og er nú í fimmta sæti þýsku úrvalsdeildarinnar.

„Ég vona að þessi mál komist fljótlega á hreint. Annars líða allir fyrir það og það væri ekki sanngjarnt," sagði framkvæmdarstjórinn Thorsten Storm í samtali við blaðið.

Nielsen er þó enn með styrktarsamning við Löwen sem gildir til ársins 2015. Hvað tekur svo við er óvíst. „Ef að hlutirnir breytast verður maður bara að taka því og finna nýjar lausnir."

Sjálfur neitaði Nielsen því í gær að hann væri að stíga frá borði. „Þetta er nýtt fyrir mér. Ég er enn í starfi aðalráðgjafa hjá félaginu og það mun ekki breytast á næstunni. Framkvæmdarstjórinn minn virðist vita eitthvað annað og meira. Það er athyglisvert - í hefðbundnum viðskiptum ganga hlutirnir öðruvísi fyrir sig.“

Nielsen hefur verið gagnrýndur fyrir að hafa afskipti af leikmannamálum. Hann hefur sjálfur samið við leikmenn og skuldbundið sig til að standa straum af launakostnaði þeirra á samningstímanum.

Guðmundur Guðmundsson er þjálfari liðsins og Róbert Gunnarsson er enn á mála hjá Löwen. Guðmundur sagði í viðtalið við Fréttablaðið á dögunum að tíðinda væri að vænta af þessum málum. „Það lítur mjög vel út með framhaldið í þeim efnum. Það mun koma í ljós fljótlega en það eru ýmis jákvæð teikn hér á lofti með framtíðina og allt sem bendir til þess að hér verði hægt að halda áfram af fullum krafti. Það er heldur ekki fullljóst hvort Jesper kúpli sig alveg frá Löwen. Það veit enginn sem stendur."

Fyrir nokkru síðan var gengið frá samningum við Alexander Petersson og danska landsliðsmarkvörðinn Niklas Landin. Storm segir að þeir samningar standi og að leikmennirnir komi til félagsins. Pólska skyttan Krzysztof Lijewski verður einnig áfram hjá félaginu þrátt fyrir að vera á háum launum.

„Við reiknum með þeim öllum. Niklas Landin og Alexander eru báðir að leita sér að húsnæði hér á þessu svæði."