Þorvaldur: Erfitt að halda áfram

Þorvaldur Örlygsson þjálfari Fram var að vonum brúnar þungur eftir sjötta tapið í átta leikjum í Pepsí deild karla í sumar, nú gegn FH 2-1 á heimavelli.

„Þetta er mikil vonbrigði en það er alltaf gaman að sjá menn leggja sig fram þó ekkert gangi upp. Menn eru með hugann við verkefnið en því miður fáum við ekkert út úr honum eins og úr flestum öðrum leikjum í sumar,“ sagði Þorvaldur

„Mér fannst spilamennskan góð. Fyrri hálfleikur var erfiður gegn vindinum, það var erfitt við hann að eiga. Menn áttu erfitt með að hemja boltann en menn börðust og voru með rétt hugarfar og á tánum en fáum klaufalegt mark á okkur í lok fyrri háflleik. Við gátum jafnað en eigum sláarskot strax í kjölfarið en litlu hlutirnir falla ekki með okkur.“

Sex töp í átta leikjum, enginn sigur og aðeins tvö stig en samt er liðið bara tveimur sigrum frá öruggu sæti í deildinni. „Það er erfitt að halda áfram og áfram og fá aldrei neitt út úr leikjunum alveg sama hversu vel þú spilar og hversu mikið þú leggur á þig. Það er ekkert vel fyrir leikmenn og þjálfara en að halda því áfram,“ sagði Örlygur en lið hans gafst ekki upp þó það fengi mark á sig undir lok fyrri hálfleiks og gaf allt í seinni hálfleikinn.

„Í fyrri hálfleik áttum við möguleika á að komast í gegnum FH vörnina en vindurinn var erfiður. Við þurftum eina tvær sendingar og þegar við komum boltanum í lappirnar á sóknarmanninum til að snúa þá komumst við inn fyrir en það var erfitt og við lentum svolítið aftarlega. En við spilum ágætlega í seinni hálfleik en ég hefði viljað setja meiri pressu fyrr en við vorum að reyna, hlaupa og berjast.“

Jón Guðni Fjóluson lék síðasta leik sinn í bili fyrir Fram og er vandséð hvernig Fram ætlar að fylla skarð hans þó Jón Guðni hafi ekki átt sinn besta leik í kveðjuleiknum. „Við erum að missa Jón Guðna út og Ívar Björnsson í uppskurð og við munum skoða hvort við getum fengið menn til að bæta hópinn og styrkja,“ sagði Þorvaldur að lokum.