Heimir: Hugsum bara um næsta leik

Heimir Guðjónsson þjálfari FH var fyrst og fremst ánægður með að sækja þrjú stig í Laugardalinn gegn Fram í kvöld í erfiðum leik sem mikill vindur sett sterkan svip á.

„Þrjú stig og við unnum fyrir þeim. Menn lögðu sig fram og voru að reyna. Það var ekki besta fótboltaveðrið en við skoruðum tvö og þeir eitt. Fram er gott lið og hafa ekki fengið mikið af mörkum á sig. Það er gott að skora tvö mörk. Við áttum að auki skot í stöngina og gerðum fína hluti en þrjú stigin eru það sem skiptir máli," sagði Heimir að leiknum loknum.

„Við vorum með svipaðan stigafjölda á sama tíma í fyrra en auðvitað höfum við ekki verið að spila eins vel og við vildum, það er rétt. Það þýðir ekkert að væla yfir því, menn verða að snúa saman bökum og halda áfram og mér fannst við gera það," sagði Heimir sem segir lið sitt hafa sett markmið sín til hliðar, tímabundið að minnsta kosti, því langt sé í KR á toppi deildarinnar.

„Markmið FH núna er einn leikur í einu og næst er leikur í Grindavík. Við eigum góðan tíma til að undirbúa hann. Það er það eina sem við horfum á núna. Það þýðir ekkert fyrir okkur að horfa á önnur markmið," sagði Heimir.