Willum Þór: Sárt að tapa svona

Willum Þór Þórsson segir að það hafi verið ansi súrt að þurfa að sætta sig við tap í Árbænum í kvöld.

Fylkir vann í kvöld 2-1 sigur á Keflavík eftir að gestirnir komust yfir með marki strax á þriðju mínútu. Það dugði þó ekki til en sigurmark Fylkismanna kom í lok venjulegs leiktíma.

„Við vorum að berjast alveg eins og þeir og þetta var því afskaplega sárt. Við spiluðum þó betur í fyrri hálfleik en í þeim seinni og þetta bara datt fyrir þá í þetta skiptið. Það er auðvitað hundfúlt.“

Hann segir erfitt að koma auga á af hverju sínir menn hafi gefið eftir í seinni hálfleik.

„Þetta er mjög tvö áþekk lið með sterka einstaklinga. Mér fannst við síga aðeins of mikið í seinni hálfleik og vera full ákafir á boltann. Ekki nægilega mikil yfirvegun hjá leikmönnum til að skapa færi. En það vantaði ekki að menn voru á fullu allan tímann.“