Heimir: Eiður fremstur meðal jafningja í vörninni

Heimir Hallgrímsson hrósaði Eiði Aroni Sigurbjörnssyni mikið eftir 2-0 sigur ÍBV á Keflavík í kvöld.

ÍBV skoraði bæði sín mörk í upphafi leiks en hleyptu Keflvíkingum aldrei mjög nærri sér eftir það.

„Það skiptir öllu máli þegar maður spilar gegn Keflavík að komast snemma yfir. Þeir eru mjög þéttir í sínum varnarleik og það er erfitt að spila gegn þeim þegar maður er marki undir eða staðan jöfn,“ sagði Heimir í samtali við Vísi eftir leikinn.

„Við ætluðum að vera hugrakkir í byrjun og vorum það. Við vissum svo að þeir myndu svo reyna að koma með boltann inn í teiginn í seinni hálfleik en vörnin okkar var frábær með Eið Aron fremstan í flokki jafningja. Hann er ótrúlega öflugur varnamaður og allur varnarleikurinn var mjög traustvekjandi í kvöld.“

Þórarinn Ingi lék sem varnarsinnaður miðjumaður í kvöld og Heimir hrósaði einnig honum.

„Hann hefur verið að spila í mörgum stöðum fyrir okkur og getur í raun spilað hvar sem er á vellinum. Það hafa fáir á Íslandi jafn góða vél eins og hann - hann er á fullu allan tímann.“

Hann var afar ánægður með stigin þrjú í kvöld. „Við unnum liðið sem var í öðru sæti fyrir kvöldið 2-0 á útivelli. Það telur rosalega mikið. Það var búið að hrósa þeim mikið og eðlilega - þeir eiga það skilið. En mér fannst við vera mun betri en þeir í kvöld.“