Hreiðar Már yfirheyrður í Al-Thani málinu

Hreiðar Már Sigurðsson, fyrrverandi forstjóri Kaupþings, var yfirheyrður fyrr í vikunni í tengslum við rannsókn á hinu svokallaða Al-Thani máli. Þetta staðfesti Hörður Felix Harðarson hrl., lögmaður Hreiðars Más, í samtali við Vísi.is.

Hörður vildi ekki tjá sig frekar um málið að svo stöddu en sagði að skýrslutakan hefði staðið yfir í nokkra klukkutíma.

Málið snýst um kaup sheikh Mohammed Bin Khalifa Al-Thani á fimm prósenta hlut í Kaupþingi hinn 22. september 2008 en grunur leikur á að um sýndarviðskipti hafi verið að ræða sem falla undir markaðsmisnotkun. Hreiðar Már er, rétt eins og Ólafur Ólafsson, sem var næst stærsti hluthafi Kaupþins fyrir hrun, grunaður um refsiverða háttsemi í málinu og hefur því réttarstöðu sakbornings.

Hreiðar Már er ekki sá eini sem yfirheyrður var í þessari viku í tengslum við rannsóknina því Ólafur var yfirheyrður í fyrradag eins og fréttastofa hefur áður greint frá.

Rannsókn málsins er á lokametrunum hjá embætti sérstaks saksóknara en Al-Thani málið er eitt af tíu málum sem embættið stefnir á ljúka fyrir áramót.