Sænskur landsliðsmaður í einangrun

Jonas Larholm, leikmaður sænska landsliðsins, mun ekki spila með Svíum gegn Síle í opnunarleik HM í handbolta í dag.

Larholm er nefnilega veikur og er því haldið í einangrun á hóteli sænska landsliðsins.

Larholm er félagi Ingimundar Ingimundarsonar hjá danska úrvalsdeildarfélaginu Álaborg og er nú að glíma við kvef.

Sænsku landsliðsþjálfararnir vilja enga áhættu taka og hafa því tekið Fredrik Petersen, herbergisfélaga Larholm, út af herbergi þeirra og er Larholm því einn inn á herberginu þar til hann jafnar sig.