Umfjöllun: Tilþrifalítið jafntefli í Laugardal

Framarar og Grindvíkingar skildu jöfn í stressleik í Laugardalnum í kvöld. Lokatölur 1-1 í leik þar sem lítið var um góð tilþrif.

Framarar voru betri aðilinn í Laugardalnum framan af. Kristinn Ingi Halldórsson var þeirra sprækastur og lagði upp eina mark hálfleiksins. Þá lék hann upp að endamörkum hægra megin og sendi fyrir á Tómas Leifsson sem skoraði af stuttu færi.

Grindvíkingar virkuðu taugaveiklaðir og náðu upp litlu spili. Þeir kýldu boltann upp völlinn hvort sem þar var samherja að finna eða ekki. Marki undir í hálfleik gátu þeir farið sáttir inn í búningsklefa og ráðið ráðum sínum.

Síðari hálfleikur var mun jafnari og allt í járnum. Orri Freyr Hjaltalín átti skot í slá úr fínu færi og fór að fara um Framara í stúkunni sem eiga enn eftir að sjá sitt lið vinna sigur í deildinni.

Um miðjan hálfleikinn var varamaðurinn Paul McShane, fyrrum Framari, fljótur að hugsa. Meðan Framarar sváfu á verðinum sendi hann boltann á Robbie Winters úr aukaspyrnu. Winters sneri af sér varnarmann Framara og hamraði knöttinn í netið. Vel afgreitt.

Það var fátt um fína drætti það sem eftir lifði hálfleiksins. Tómas Leifsson fékk besta færið til þess að tryggja þrjú stig en skot hans himinhátt yfir úr dauðafæri.

Lokatölurnar 1-1. Úrslit sem Grindvíkingar eiga mun auðveldara með að sætta sig við en lánlausir Framarar. Ef það var einhvern tímann kalt á toppnum þá er skítkalt á botninum.

TölfræðiSkot (á mark): 15-6 (7-3)

Varin skot: Ögmundur 2 – Óskar 6

Horn: 11-2

Aukaspyrnur fengnar: 13-12

Rangstöður: 3-2

Dómari: Guðmundur Ársæll Sigurðsson 5