Björgólfur fluttur burt í sjúkrabíl eftir æfingu

Víkingar urðu fyrir miklu áfalli í kvöld þegar framherjinn Björgólfur Takefusa meiddi sig illa á æfingu liðsins. Björgólfur meiddist á hné á æfingunni og var fluttur á brott í sjúkrabíl.

"Við vitum ekki nákvæmlega hvað það var sem fór í hnénu. Það bólgnaði samt upp og því ekkert annað að gera en að fá bíl," sagði Andri Marteinsson, þjálfari Víkings, við Vísi nú í kvöld.

Björgólfur hefur verið að kenna sér meins í hnénu í nokkurn tíma en ekki var búið að finna út úr því hvað væri að. Svo gaf hnéð sig í kvöld.

Andri sagði ekki ljóst hversu lengi Björgólfur yrði frá en hann spilar ekki fótbolta næstu vikurnar hið minnsta.