Umfjöllun: Bikarhefnd KR-inga í Frostaskjólinu

KR-ingar hefndu í gær fyrir ófarirnar í bikarnum á síðustu leiktíð gegn FH með sigri, 2-0, á Fimleikfélaginu í 16-liða úrslitum Valitor-bikarkeppni karla, en leikið var í Frostaskjólinu.

KR-ingar mættu grimmari til leiks og voru með góð tök fyrstu tuttugu mínútur leiksins en það var ekki sjón að sjá FH í byrjun leiksins. Leikur þeirra var tilviljunarkenndur og menn áttu erfitt með að halda boltanum innan liðsins. Heimamenn fengu ákjósanleg færi í fyrri hálfleiknum en náðu ekki að setja mark sitt almennilega á leikinn.

Fimleikafélagið vaknaði aðeins til lífsins þegar líða tók á fyrri hálfleikinn en staðan var samt sem áður 0-0 í hálfleik.

Heimamenn komust yfir í byrjun síðari hálfleiks með marki frá Gunnari Erni Jónssyni, leikmanni KR, en hann skallaði boltann í netið eftir magnaði fyrirgjöf frá Magnúsi Má Lúðvíkssyni. Virkilega vel útfærð sókn hjá KR-ingum og þeir komnir verðskuldað með yfirhöndina í leiknum.

FH-ingar virkuðu andlausir og oft á tíðum mjög svo pirraðir en það gekk erfilega fyrir gestina að skapa sér hættuleg færi og það hafði greinilega slæm áhrif á leikmenn liðsins.

Heimamenn voru fastir fyrir og vörn þeirra var þétt á meðan sóknarleikur FH-inga var hugmyndasnauður og löng skot utan af velli virtist vera það eina sem gestirnir höfðu upp á að bjóða.

FH-ingar vildu fá dæmda vítaspyrnu þegar um tíu mínútur voru til leiksloka, en það virtist Jordao Diogo, leikmaður KR, verja boltann á marklínu með hendi. Líklega höfðu þeir eitthvað til síns máls.

Rétt fyrir lok venjulegs leiktíma fékk Tommy Nielsen, leimaður FH, að líta sitt annað gult spjald og var sendur í bað. Strax í kjölfarið náði Grétar Sigfinnur Sigurðarson, leikmaður KR, að gulltryggja sigurinn með fínu skallamarki.

Frábær sigur KR-inga staðreynd gegn slöku liði FH í Vesturbænum.



KR 2 – 0 FH - Tölfræðin í leiknum1-0 Gunnar Örn Jónsson  (52.)

2-0 Grétar Sigfinnur Sigurðarson (87.)

Skot (á mark): 5 – 7 (5-1)

Varin skot: Hannes  0 –3 Gunnleifur

Horn: 8 – 5

Aukaspyrnur fengnar:12 – 8

Rangstöður: 2-0

Áhorfendur: óuppgefið

Dómari: Gunnar Jarl Jónsson 6