Brand: Dagur hefði orðið góður landsliðsþjálfari

Heiner Brand, fyrriverandi þjálfari þýska landsliðsins, segir að Dagur Sigurðsson, þjálfari Füchse Berlin, hefði verið góður kostur í landsliðsþjálfarastarfið.

Brand hætti fyrr á þessu ári og var Dagur annar þeirra sem kom til greina í starfið. Hinn var fyrrverandi aðstoðarþjálfari Brand, Martin Heuberger, sem var á endanum ráðinn.

Brand var í viðtali við dagblað í Berlín þar sem hann hrósaði Degi og lofaði þann árangur sem hann hefur náð með Füchse Berlin. Liðið keppir í Meistaradeild Evrópu í vetur en frábært gengi liðsins í þýsku úrvalsdeildinni á síðustu leiktíð kom mörgum í opna skjöldu.

„Dagur er góður þjálfari og hefur komið góðu skipulagi á leik liðsins. Ég hef fulla trú á liðinu í Meistaradeildinni í vetur,“ sagði Brand.

„Hann hefði án nokkurs vafa spjarað sig sem landsliðsþjálfari Þýskalands enda sýndi hann á síðasta tímabili hversu öflugur þjálfari hann er. En Heuberger var einnig góður kostur í starfið.“